tagalog tripping

Nais kong ipaabot ang aking paumanhin kay Ron Aldrin. Pasensya na kung akala mong pinaasa kita dahil ako'y patuloy na nakikipag-ugnayan sa'yo sa pamamagitan ng cellphone. Ginagawa ko lamang iyon dahil nais kitang pakitunguhan ng maganda sapagkat naging maliit na bahagi ka rin ng aking buhay. Maliit, kamo, dahil sa mahigit na isang taong relasyon ay hindi ko talagang nadama ang sinasabi mong pagmamahal sapagkat hindi tayo nagkasama katulad ng inasahan ko.

Mahigit tatlong taon na ang nakaraan at sinabi mong nagkaroon ka pa ng dalawang inibig at ako'y natuwa dahil inakala kong ako'y nalimot mo na. Ngunit nang tayo'y magkausap muli noong huwebes, ika'y humingi ng panibagong pagkakataong maipamalas sa akin ang iyong pag-ibig. Pag-ibig na aking pinutol sapagkat nahulog ako para sa isang taong... hindi ko pala dapat minahal.

Ang lungkot na naririnig ko sa'yong boses at ang iyong paghinga ng malalim - nais kong ibalik sa'yo at magpasalamat. Dahil kahit ako'y mayroon ng ibang mahal, ika'y naririyan at nangangakong hindi magbabago ang iyong nadarama.

Salamat, ngunit sana'y matuto kang humarap sa kinabukasan mo, dahil nalalaman kong wala ako roon.